“Ia faaagavaaina alalafaga faamausali le lotoifale ma faama’ite le faatuputupulaia o le tamaoaiga” o le sini lea o le taiala o le lumanai manuia o le atunuu ma ona tagata mo le tausaga faaletupe o loo faagasolo nei e oo atu i le tausaga 2025.
O le faaiuga o le vaiaso nei e faalauiloa ai lea taiala i le motu tele i Salafai ina ua tuanai ai ona faalauiloa i Upolu i le Aso Faraile o le vaiaso na tea nei.
Taua e le afioga i le Palemia Fiame Naomi Mataafa “O le tatou taiala fou mo le lumanai manuia o Samoa, e leo se mea fou foi lea tulaga mai le sau ai foi o faigamalo mai lea nofoaiga i lea nofoaiga. O loo savali pea faigamalo i luga o fuafuaga e tai 5 tausaga ona faataatia. Talu la ona pale mai le tatou faigamalo fou ia Iulai (2021) o lea sa galulue aemaise lava i lalo o le taitaiga a le Ofisa o Matagaluega o Tupe e faapena ona toe faataatia ia fuafuaga mo le luamnai manuia o le atunuu”.
Taua foi e Fiame “O le fuafuaga lea e pei foi ona sa sau a’i ia tatou faigamalo i nofoaiga ua tuanai, o le fua lea e sosolo ai gaioiga a le malo atoa i ona itutino eseese ma e taua tele le mafai ona faataatia o lea auivi poo le faava’a e faapena ona fai ma vaaiga taula’i i tapenaga a vaega eseese o le atunuu”.
Na faafetaia ai foi e le Palemia i le taitaiga a le Minisita o Tupe ma le Matagaluega i le galuega sa galulue ai aemaise ona o le faigamalo o loo iai nei o se faigamalo fou ma e ao foi ona fai silasila i mea o loo ave iai le faamamafa i lenei vaitau ma tapena atu ai fuafuaga i vaega eseese o Samoa.
E lima ni vaega ua autu iai le taiala lenei e aofia ai :
- Faaleleia o le atinaega o soifuaga lautele
- Faalauteleina o le tamaoaiga ma gafataulimaina
- Saogalemu ma le faatuatuaina o pulega lelei
- Siosiomaga malupuipuia ma Suiga o le tau
- Tulaga i galuega a le malo ma atinae tetele
O loo taulai fuafuaga uma o loo faaalia e le taiala i le unaia ai o le tamaoaiga o nuu ma afioaga ma siitia le soifua lelei o tagata i le itu o le soifua maloloina ma atinaeina o le latou lotoifale ia soifua fiafia ma fetausia’i.
