O le Aso Faraile na mavae nei na faalauiloa ai le lipoti o le suesuega o tagata faigaluega ma le faafaigaluegaina o Tamaiti 2022.
O le tamaitai Minisita o Fuainumera Faamauina le Afioga Mulipola Anarosa Ale Molioo na saunoa i lea faamoemoe.
O lea lipoti sa mafai ona faamauina ma tuuina mai ni faailoilo lea o loo lipoti ai Samoa i Manulauti o Atinae Gafataulimaina 2030.
I faamaumauga o lea lipoti e lua ni faailoilo fou o loo faaalia mai ai, o le faailoilo o i latou e 5 tausaga agai i luga o loo galulue i galuega faalotoifale e leai se totogi lea e tusa ma le 76% atoa ai ma galuega tausi e leai se totogi lea e tusa ma le 27.9%.
O le isi faailoilo o le fanau mai le 5 i le 17 tausaga le matutua o loo faafaigaluegaina ma e tusa lea ma le 11.5%.
O loo faaalia foi le pa’ū maualalo ai o le pasene o i latou e leai ni galuega mai le 14.7% sa iai, i le 5% na faamauina ina ua mae’a ai o le 10 tausaga.
Na o le 5% na tuuitiitia ai le vaega o tupulaga e lē o aooga pe faigaluega foi mai le 2012 lea sa faamauina ai e tusa ma le 35% le faitau aofai ae oo mai le 2022 ua tuuitiitia i le 30.1%.
Ua faamauina foi le siitia mai le tausaga 2017 o totogi o tagata faigaluega i masina mai le $1268 i le $1620.
O loo vaaia foi le siitia o le pasene o tamaitai o loo umia tulaga tofi maualuluga i galuega mai le 9% sa iai i le 2012 i le 12.6% i le 2022.
Ae o le vaega o galuega lē aloaia sa faamauina i le 37.3 % i le 2017 na tuuitiitia lea vaega i le 25.3% i le 2022.
Na saunoa le tamaitai Minisita o lenei lipoti ma faailoilo o le a mafai ona faaaogā e le malo, o pisinisi ma faalapotopotoga mo faaiuga fai ma tuufaatasi ai faiga faavae e siitia ai le soifua manuia o tagata lautele.
