Ua faailoa nei se tasi o aseta a le malo ua faatupe e le Faletupe o Asia le Asian Development Bank e ala i se vaa toso (tugboat).
O lenei vaa o le a fesoasoani i le faaitnoina o galuega i le puipuia o le ogasami o Samoa ae faapea le fesoasoani lea i le taulaina o vaa e uia Samoa ae lē gata i lea o le a faaaogāina i tulaga o faalavelave faafuase’i poo emergencies.
Na auai le ta’ita’i o le atunuu, le afioga i le Tamaitai Palemia Fiame Naomi Mata’afa, le Faatonu o le Faletupe o Atina’e a Asia ia Lea Gutierrez, le sui o le ADB faapea nisi o minisita o le Kapeneta aemaise le minisita o Galuega Tetele a le malo Olo Fiti Vaai ai le tatalaga aloaia o lenei atinae fou.
O lenei vaa toso ua faaigoaina Sa’ula 60 o se faamanatuga o le 60 tausaga o le tuto’atasi o le malo o Samoa i lenei tausaga o le a suitulaga i nisi vaa tuai a le malo sa iai lea ua silia ma le 50 tausaga le umi talu ona faaaogā.
O polokalame o loo vaavaalua ai le ADB ma le malo o Samoa o le taula’i lava i le saogalemu ma le puipuiga malu o le ogasami o le atunuu ae lē gata i lea o le faaleleia o soo se vaega i lea auaunaga.
