O le kamupani gaosi sikaleti le British American Tobacco poo le BAT i Samoa, ua faalauiloa nei sana uluai taumafaiga e lagolago ai i le faasaoina o le siosiomaga o le gaosia lea o le eletise mai malosiaga faafouina e ala i le malosi o le la. 

Ua fuafua ai lea kamupani o se taimi o le tausaga nei o le a aumai ai ni ana taavale e alu i le eletise e pei ona faaaogā ia ituaiga o taavale i nisi o atunuu o le lalolagi.

O le afioga i le Sui Palemia afioga Tuala Tevaga Iosefo Ponifasio na avea ma sui o le Malo e saunoa i le faalauiloaina o lea atina’e fou, i le faamoemoe e lagolago i le malo ma ana taumafaiga e faaitiitia kasa oona ua faaleagaina ai le lalolagi.

E silia i le ‘afa miliona tala se tupe a le kamupani o le BAT na faaalu i le faapipiina o laupapa poo solar panels mo le gaosia o le eletise mai le la.

O se sao lea o lea kamupani i isi auaunaga faapea o loo i le atunuu o loo lagolago i taumafaiga o le fausia o malosiaga faafouina poo renewable energy.