O le avanoa lona lua poo le second chance, o se polokalame mo i latou o nofosala i le falepuipui, ma nisi sa tuli faasalaga i lea nofoaga ua taumafai ai e toe fuata’ina o latou olaga, ma taofia ai le toe soli o le tulafono.

O lea polokalame ua a’oa’oina ai nisi o i latou i tomai e pei o galuega taulima ma le tusi ata, ma o ia galuega ua faalauiloa i le maota faamasino i Mulinuu, o loo faagasolo ai nisi o polokalame o le fono a malo o le taupulega, e pei o le fonotaga i mataupu e taofia ai sauāga.

Faaalia e se tasi o fisa sinia o le pulega o le falepuipui i Tanumalala o le faalauiloaina o ia galuega i le taimi o le fono o se fe’au o loo momoli atu i tagata o atunuu o loo auai i le Fono a Malo o le Taupulega, i galuega o loo faatino e Samoa e fesoasoani i le toe faaleleia o olaga o i latou sa nofosala i le toese.

 O le Faatonu o le polokalame le susuga Motunuu Teofilo Mikaele sa fesiligia mo sona finagalo e tusa o le polokalame ma ata tusi faapea galuega taulima o loo faalauiloa i le maota faamasino i Mulinuu.

O se talanoaga ma le susuga Motunuu Teofilo Mikaele o le faatonu o le polokalame o le second chance poo le avanoa lona lua mo pagota i totonu o le falepuipui i Tanumalala.

O se tasi o alii talavou sa tuli lona faasalaga i le falepuipui sa ia tusia le ata o se portrait o le Tupu o Peletania o Salesa III ma o loo faalauiloa ai i lea polokalame e pei ona molimauina le matagofie o lea ata auā o loo laei e le tupu le peleue e iai mamanu o elei Samoa.

O loo iai le talitonuga o le a fai ma meaalofa e manatua ai le asiasiga mai i Samoa a le Tupu o Salesa ma Lana Masiofo o Camilla.