O loo faaauau pea ona vaaia le pa’ū maulalo o le malosi o le tālā Ausetalia i lenei vaiaso pe a faatusa i le tupe Amerika ma isi.
Fai mai se lipoti i le ABC sa tulaga lelei mai lava i nai vaiaso ua tuana’i peitai ua faafuase’i ona vaaia le maualalo o le tulaga ua iai ma ua faailoa o nisi mafuaaga e faalagolago lava i maketi tetele i atunuu i fafo.
O nisi mafuaaga e aofia ai le vaivai o le tamaoaiga o Saina, o faamata’u ua fai ane a Amerika e uiga i le tuuina o tariffs i luga o oloa faatau atu atoa ai ma nisi tulaga tau fefaataua’iga e tau fai aafia uma ai le malosi o le tālā Ausetalia.
O le itu lē lelei ona ua atagia i lipoti e foliga e faaauau pea ona faaitiitia le malosi o le tālā lea i le aga’i atu i le lumana’i.
E ui i le tulaga e pei ona faailoa mai ae talitonu nisi e telē le silafia i le mataupu lea, e iai foi le isi itu lelei ona o Ausetalia le isi atunuu e tele ana oloa o loo aveina atu i maketi ma atunuu i fafo aemaise foi le sootaga ma Saina i tulaga tau fefaataua’iga ma e ono toe iai foi se suiga lelei i se taimi vave e fua lava i le maketi.
Fai mai i le maketi faavaomalo o le tālā Ausetalia i le taimi nei e na o le .62 sene tupe Amerika.
Puna o Faamatalaga: https://www.abc.net.au/news/2024-12-24/australian-dollar-china-trump-interest-rates/104749520
