Ua faamaonia ma ua faalauiloa faalaua’itele mai e le Minisita o Tupe, Nicola Willis, le faaitiitia ai o le seleni o tupe faaalu mo auaunaga faaopoopo mo lenei tausaga faaletupe 2025-2026.
E amata i le masina o Me o le a faaitiitia i le 1.3 piliona le tupe faaalu poo operating allowances ua faaagaga mo le paketi, o se numera ua maitauina le pa’ū maualalo o le tupe faaalu mo lenei tausaga faaletupe, e pei ona tuuitiitia i le 1.1 piliona mai le 2.4 piliona o le tupe faaagaga sa iai.
I le tuu mai ai o lenei mataupu, ua faailoa e le tamaitai Minisita, e to’aitiiti lava le numera o Matāgaluega ma Pulega a le malo o le a maua se tupe faaopoopo ia latou paketi.
E ui i nei vaaiga faaletonu i le tala o le seleni ma le tuuitiitia ai o tupe faaalu mo lenei paketi, ae ua valo’ia e le tamaitai Minisita, le oo atu i le tausaga 2029 ua toe vaaia le maualuga o tupe faasili a le atunuu.
Ua lipotia e le leitio faavaomalo le faamanino ai e le Minisita, o le a mautū lava le ave ai o tupe nei mo le tele o auaunaga i le atunuu, ma o le a tepa taula’i lava i na o a’oa’oga, o le soifua mālōlōina, o auaunaga tau le tulafono, puipuiga ma nisi o inivesi, ma le tau atina’e o pisinisi ma le fesoasoani i le taugatā o le soifuaga ua iai nei.
Puna o Faamatalaga: https://www.rnz.co.nz/news/political/559338/1b-cut-to-operating-allowance-coming-in-budget-nicola-willis-says
