E oo atu i le $1.3 miliona i le masina na maua e le faletalimalo a o faaaogā ai e avea ma nofoaga faanofoesea.
O faamaumauga mai le matagaluega o pisinisi ma galuega lea sa gafa ma le vaaiga o nofoaga faanofoesea o loo sau ai e latalata i le $800 miliona i totonu o le 18 masina na faaalu i lisi.
E 33 faletalimalo na ioeina e le matagaluega e faaaogā uma potu, faia tagamea faapea ma meataumafa e faatolu i le aso mo pasese e taunuu mai fafo na faanofoesea.
O le tau foi na totogiina atu i le faletalimalo e tasi sa fua lava i le nofoaga o loo iai, to’atele o tagata e nofoia faapea le aotelega o auaunaga sa ofoina mai.
I le tuufaatasiga, o faletalimalo i Aukilani na alu ai le $529.8 miliona, faletalimalo i Kalaiesetete na totogi iai le $136.11 miliona ma le $115.3 miliona mo Hamilton, Rotorua ma Ueligitone.
O le tele o faletalimalo na faaaogā o fale nei e iai foi isi o latou lālā i isi atunuu faapea pulega faavaomalo o loo faamalumalu ai, ma a o iai tala o le tele o nei tupe maua na toe alu i atunuu i fafo, e lē o sa’o i le pule sili o le Hotel Council Aotearoa e pei ona ia finau ai e le’i faapea na alu uma i fafo le tamaoaiga na maua e faletalimalo iinei.
E le’i faigofie i faletalimalo le toe faalauiloa o nei tupe maua, peitai e ono fesoasoani lea i le faatulagana i le maketi ma le vaai a tagata inivesi.
O le faai’uga o le masina e tapunia ai faletalimalo e tolu o loo faaaogā pea e avea ma nofoaga faanofoesea.
