E manatu le vaega faaupufai a le ACT e ao ona faamanino le mataupu i contractors poo i latou ua sainia ni konekarate mo le faatinoina o galuega, ina ia aua ne’i o latou lu’iina tulaga o a latou galuega i le faamasinoga.
O le taitai o le vaega faaupufai, David Seymour na ia folafola le faiga faavae a lana vaega faaupufai i Aukilani i le asō ma faailoa ai o le Tulafono tau Galuega, le Employment Relations Act e tatau ona suia ina ia aua ne’i aofia ai contractors mai le faauigaina o tagata faigaluega poo employees.
O le faaiuga a le faamasinoga sa faia i le faamasinoga o galuega i le tausaga talu ai ua faailoa ai o avetaavale o uber o tagata faigaluega ae le o ni contractors ma e tatau ona iai foi aiātatau tau galuega ma le puipuiga foi e aofia ai ma aso ma’i ma holiday pay.
O le masina nei ua mafai ai ona talosaga le kamupani a le Uber e toe apili lea faaiuga ae o loo faailoa e avetaavale o le a toe finau atu pea foi iai e pei ona faailoa e le RNZ.
Fai mai la Seymour o le faiga faavae a lana pati o loo ta’ua ai afai ae faatumauina pea le faaiuga a le faamasinoga, o le a tele pisinisi e le mafai ona toe faaauau.
