Ua faamata’u mai tagata tetee na o latou ave faamalosia le pailate Niu Sila o Philip Mehrtens i le vaiaso talu ai, o le a latou faaoo iai le oti pe afai e sailia atu i latou e le ami a Indonesia.
O le asō ua faailoa ai nisi o ata ma videos se faamatalaga a le alii pailate ma e foliga mai e le o faamanualia o ia ae o loo siomia e nisi o tagata tetee nei separatists o loo u’u mai a latou auupega o fana.
O loo faailoa mai ai i lea video e le pailate o loo taofia faamalosi o ia e le vaega a le TRNPB poo le vaega lea a le West Papua Liberation Army ma faamanino mai ai o loo finau lea vaega mo le saolotoga o le itumalo mai ia Indonesia.
O le asō foi na faamaonia mai ai e le ofisa o le va i fafo a Niu Sila ua o latou silasila i ata ma videos e pei ona faamatuu ane ae le o faia sa latou faamatalaga e tusa o lea tulaga.
