A o tālia le faai’uga i le filifilia o ta’ita’ifono o komiti o Fono Faavae mo le polokalame o le atina’e o nuu ma afio’aga o itumalo faapalota e 51 o le atunuu, o lea ua iai se faai’uga a le malo e pei ona faailoa e le Palemia le iai o se faalapotopotoga tuma’oti a le malo ua faavaeina e tuu iai le faagaioia ma le pulea o le poloketi o le miliona tala.
Ua aveesea ai le faafoeina o lea poloketi i le auaunaga a le matāgaluega o tinā ma tama’ita’i lea o le a suia lona igoa o le matāgaluega e faapitoa i le atina’e manuia o aiga uma o Samoa.
Ua faailoa lea faai’uga a le Kapeneta e le Palemia susuga Laaulialemalietoa Leuatea Polataivao Fosi i le tuana’i ai o le fā tausaga ma masina o faagaioia le poloketi miliona i lalo o le pulega a le Matāgaluega o Tinā ma Tama’ita’i, Atina’e o Afio’aga ma Aga Fesoota’i.
