Ua faailoa mai igoa o alii uma e toalua ia na maliliu ina ua tafana e le alii talavou 24 tausaga le matua, i le nofoaga o se fale o loo fau i le aai o Aukilani i le Aso Tofi o le vaiaso talu ai.

O Solomona Tootoo, e 45 tausaga le matua mai Manurewa, ma Tupuga Sipiliano, e 44 tausaga le matua mai Wattle Downs.

O nei alii uma o ni tagatanuu Samoa, ma sa faigaluega uma i le nofoaga o le faugafale lea na agai iai le tama talavou 24 tausaga le matua, o Matu Reid ma faaoo iai le oti, ma i nisi o molimau o loo ta’ua ai, e foliga e masani lelei uma i latou nei e toatolu.

E lei maua mai se lipoti mautu mai leoleo i se mafuaaga tonu na osofia ai le alii talavou faatupu le faalavelave na ia faia, ae mai se tasi o molimau o loo lipotia i luga o le NZ Herald o loo ia ta’ua ai, o le faalavelave na alu atu Reid e faataunuu, e iai lona talitonuga e lei alu atu e faataunuu faasoloatoa i soo se tasi, ae e iai lava tagata na alu atu patino iai le alii talavou e faatino iai le faalavelave.

Na ta’ua i le Herald le molimau a se tasi tagata na vaaitino i le mea na tupu, o se tasi e lei atoa se masina talu ona faigaluega ai i lea fale o loo fau.

E le o faailoaina lona igoa, ae na ia ta’ua ai lona lagona atu o Reid o loo e’e “So what you going to do to me now…what can you do”.

Fai mai lea molimau, i lana faalogo atu i le leo o Reid lea sa avaavau, e foliga mai o tagata ia na ia tafanaina, sa ia manao lava e faaoo iai le oti ia i laua ia.

Na ta’ua e le molimau lea, ina ua agai mai Reid i le potu lea sa iai o ia, na toe savali ese filemu lava, e foliga e lei iai sana fuafuaga e tafana faasoloatoa soo se tasi, ma o lana faalogo atu i le leo o Reid lea na avaavau ma e’e mai ai, e foliga na alu atu lava le alii ma lana fuafuaga ua uma ona faatulaga.

E tupu le faalavelave lea na faatino e Reid i le Aso Tofi talu ai, o loo faasala le alii i le home detention, ae sa iai le faatagana i lalo o ni tuutuuga, sa mafai ai ona agai atu i le nofoaga lea sa faigaluega ai.

E lima masina o lona faasalaga home detention na faasala ai i le masina o Mati i le 2021 i moliaga o le faaoolima sauā, e faapea na ia fasia ma titina ai se tamaitai lea na gau ai se ponaivi o le ua o lea tamaitai.

O lena osofaiga na faia e Reid ae o loo iai foi i se faasalaga sa nofo vaavaaia ai mai se isi foi moliaga o le faaoolima na ia faatino muamua atu.

O le moliaga lona lua lea i le faaoolima, e tusa ai ma faamaumauga o le faasalaga na tuuina mai e le faamasino na taulimaina lena moliaga, Judge Stephen Bonnar KC, o loo faailoa ai se fautuaga mai le tagata ofisa a le faanofo vaavaaia na nafa ma le iloiloina o le tulaga o Reid, lea na sau ai le fautuaga, e fetaui mo Reid le home detention ona e itiiti lava se lamatiaga pe lē o iai se tulaga e na te toe faia ai se solitulafono.

O lena moliaga o Reid lea e iai lona faasalaga o le home detention, na mafua mai a o nofo i se fale i North Shore, sa nonofo ai foi iina i nisi aso o le vaiaso ma mātua o le teine lea na ia faaoolima iai.

O se feeseeseaiga na tulai mai ina ua fai e le tamaitai se tala na oso faafuase’i ai le ita o Reid ma amata loa ona laulauvavale i le tamaitai seia oo ina ua faaoolima i ai, ma faia foi ni ana tala taufaamata’u i le mea na te faia i le tamaitai ma lona aiga.

Ae o le faalavelave na ia faatinoina i le nofoaga o le fale o loo fau i Aukilani i le vaiaso talu ai, e toalima isi tagata o loo manunu’a tigaina ai e aofia ai ma se alii leoleo, e ese mai ia i latou ua maliliu.

O loo tatalo pea leoleo i soo se tasi na tapueina ni ata poo ni ata video o le taimi tonu na tupu ai le faalavelave, ina ia auina atu i le ofisa o leoleo e fesoasoani i le faagasologa o latou suesuega.