O le aumau ai i Samoa o nisi o tagatānuu o Saina ona o galuega ma pisinisi o loo tautua ai, o le tāua o lo latou malamalama ma silafia tulafono i Samoa e faasino i lo latou saogalemu, o le mafua’aga lea o se feiloa’iga sa tapena e le ofisa o le malo o Saina i Samoa ma sui o le auaunaga a le matagaluega o leoleo, falepuipui ma le toe fuata’ina o loo feiloa’i atu ai i tagata lautele poo le Police Community Engagement Unit.

Ua faailoa e le matagaluega i lana upega tafa’ilagi o se avanoa tāua lea ua mafai ai ona faamalamalama ma isi tulafono mo le maua iai o se malamalamaaga o ia tagatānuu Saina o loo nonofo i Samoa.

E lē gata ina tāua lea faatasiga ia i latou ae ua faaalia e le matagaluega o se avanoa lelei tele ma tāua e maua ai le loto talitonu, ma le galulue faatasi o le auaunaga a leoleo ma le atunuu lautele.

O le Aso Toonai na te’a nei na faatino ai lea feiloa’iga, ae o le aso foi lea na masii atu ai i Saleaumua le aumalaga o ni foma’i mai Saina mo le faatinoina o se latou galuega faia fua e lē totogia, e ala i le siakiina o le soifua mālōlōina o tagata o lea afio’aga i le motu o Upolu.

Ua faaalia i se pepa o faamatalaga mai le ofisa o le sooupu o le malo, e 12 masina o loo galulue ai i Samoa lea vaega o foma’i mai lea atunuu.

O lea galuega fesoasoani sa aofia ai ma ni sui se to’atolu o ni tagata mai Saina e iai tomai a’oa’oina i le atina’eina o faato’aga.

Sa feiloa’i atu foi i le mamalu o le afio’aga ma faailoa ai le latou fesoasoani e mafai ona galulue ai i le faaleleia o faato’aga a le nuu o Saleaumua i Aleipata.