O le lipoti a le sui Minisita o le Matagaluega o Alamanuia, Pisinisi ma Leipa o loo iai le auaunaga o le faia o feutanaiga uma mo talosaga i galuega faavaitaimi, ua manino mai ai, e iai nisi o tagata faigaluega i le vaega o galuega faavaitaimi sa latou faaauau ona tapena pea nisi o aumalaga.

Ma ua faailoa ai i le suesuega o se tasi o tagata faigaluega sinia o loo ave ona aso malolo poo livi i atunuu i fafo, o ia lea na faia mai faatonuga i auala o fesootaiga faaonapo nei, ae faatino e nisi i le ofisa i Samoa gaioiga uma.

E toa 25 le aumalaga na tuua Samoa i le aso 8 o Ianuari ae ua mae’a faamautu le finagalo o le Kapeneta e taofia lē tumau le toe malaga o nisi, sei mae’a le iloiloga a le komiti faapitoa a le Kapeneta.

O le isi aumalaga na tuua le atunuu i le aso 15 o Ianuari ae ua taoto lea faaiuga, ma o le mafuaaga lea na faatonuina ai loa se suesuega faalotoifale i le tulai mai o lea tulaga. 

I le lipoti o le sailiiliga a le sui Minisita le afioga Toesulusulu Cedric Schuster ua i luma o le laulau a fono a le Kapeneta, ua faatoese ai tagata o le aufaigaluega o le ofisa o galuega faavaitaimi na lotolotoi i le tapenaina o ia aumalaga, ma latou faailoa o se sasi, ae lē o se aa’itui poo le faatautee i le faaiuga.

Ua latou talosagaina se isi avanoa e tuu atu e faaauau ai le latou tautua i le Malo, ma le faamatalaga ua avea le sese o le latou gaioiga na fai o se aoaiga mo i latou.

O loo tālia le suesuega a le komisi o galuega a le Malo i le mataupu lenei, e pei ona faamalolo lē tumau ai le Ofisa Sili ma se tasi o ofisa sili lagolago o loo galue i le vaega o galuega faavaitaimi.

E pei ona silafia ua mae’a ona tuuina atu i le Kapeneta le lipoti o lea iloiloga, e pei ona toe tatala malaga mo galuega faavaitaimi, ae o le masina o Aperila e amata faamamalu ai aiaiga fou i le sailia o tagata e agavaa tonu i ia avanoa faigaluega i Niu Sila ma Ausetalia.