O Vaimauga 1 ma Vaimauga 3 o nisi ia o itumalo faapalota ua faailoa lautele i luga o fesoota’iga televavave le social media, le avea ai o ni tamalii se to’alua ma sui tauva o le palota tele o loo sosoo ai nei a le atunuu.

O Vaimauga 3 o lea ua faailoa e se tasi o matai o le nuu o Magiagi le susuga Taioaliiseu Taimalelagi Saunia Fiti lona avea ai ma sui tauva e lagolagoina le vaega faaupufai e puipuia aiātatau a tagata le H.R.P.P.

O se tamalii sa galue i le Matāgaluega o Faamasinoga ma le Faafaoeina o Mataupu Tau Faamasinoga mo le tele o tausaga, ae na faaauau lea tautua i le Malo i le Matagaluega o A’oga ma Aganuu.

O le sui faipule o loo avea ma sui usufono i le Palemene mo le itumalo o Vaimauga 3, o le afioga Lautimuia Afoa Uelese Vaai, o le vaega faaupufai o le Faatuatua i le Atua Samoa ua Tasi.

Sa manumālō i le palota laitiiti na toe sa’ili ai se sui usufono o lea itumalo palota i le tausaga e 2022 ina ua tuumalo le afioga Tapunuu Niko Lee Hang na manumālō i le faiga filifiliga a Vaimauga 3 i le palota tele o le 2021.

O le itumalo faapalota o Vaimauga Tasi, o loo tula’i ai i le tofi faipule le afioga Sulamanaia Tauiliili Tuivasa, o loo lagolagoina le vaega faaupufai e puipuia aiātatau a tagata, ae o le Aso Toonai na te’a nei na momoli ai i le vaega faaupufai o le Faatuatua i le Atua Samoa ua Tasi le sui tauva mai le afio’aga o Laulii, o se tasi o nuu e aofia i le li’o o lea itumalo palota.

O le afioga Pauga Te’omatavu’i Talalelei Pauga ua na filifilia lea itu faaupufai e lagolago iai ma tauva ai i le isi palota tele.

O le momoliga o lea tamalii sa molimauina i ata na faasalalau i upega tafailagi le afio ai o le afioga i le Sa’ofaapito le afioga Leniu Vainiu Te’o ma nisi o matai o le afio’aga.

O Pauga Talalelei Pauga sa avea ma Pelesetene o le faalapotopotoga o taaloga a Samoa le SASNOC.