O lea ua faailoa e le afioga i le Minisita o le Kamupani Vaalele o le Samoa Airways faapea le tamaitai Minisita o Tupe e le’o toe mamao ni vaiaso ona maua lea o le finagalo o le Mālō i le mataupu vaalele lisi 737-800 o loo iai nei i Brisbane Ausetalia mo siaki o le saogalemu.
O le tali a le tamaitai Minisita o Tupe Mulipola Anarosa Ale Molioo i fesili a sui faipule i le tala o le tupe na ia faailoa ai sona popolega i aitalafu ua iai nei a le Kamupani Vaalele o le Samoa Airways e pei ona ia faailoa ua 35 miliona tala.
Taua e Mulipola “O le tulaga i le tatou vaalele o le a o’u talanoa lava ona o le matou foi tiute ma le matafaioi o loo aafia ai a tatou seleni, atonu o lea na saunoa foi le afioga i le Minisita toe tasi a le matou feiloaiga ma le fonotaga ma le matou komiti ona fai loa lea o se faaiuga ona tuuina atu i luma o le laulau a le Kapeneta.
O le taimi nei i le tatou vaalele i le nonogatupe o loo iai i le taimi nei e 35 miliona ma e maitau atu o le tele o miliona lenei o loo faatupe mai e le UTOS, mo le silafia o le UTOS o se tasi foi lea o vaega e lalo lo’u portfolio ma oute popole tele e iai le talitonuga tatou te au faatasi e matuā aoga le vaalele, ae o ni options sa o’u vaavaai iai. Muamua faafetai i le faigamalo e tusa ai foi ma lenei aseta taua e mafai ona atia’e ai tamaoaiga o lona uiga e tatau ona aumai le vaalele. Ae e iai foi isi options sa o’u mafaufau iai e tatau ona toe faafoi le vaalele ae o le vaalele o lea ua i Brisbane o lona uiga lea ua agai mai le vaalele, sa o’u talatalanoa lava i le afioga i le Minisita se vaai a matou tupe ia totonu o le UTOS nei te’i ua uma atu le UTOS ae toe talosaga mai le NPF e fai atu ni nonogatupe ma aafia ai vaegatupe a tatou tagata, o lo’u popolega lena”.
Na faaali foi manatu a le susuga ia Olo Fiti Vaai e faatatau i lea mataupu e tali fuaitau ai i le manatu o le sui o le vaega a le ituagai afioga Lautafi Selafi Purcell i le tulaga ua iai le vaalele i le Aso 21 o Setema, taua e Olo “Ou te ta’u mama atu o a’u lea na tuai mai ai le vaalele sa o’u taofia le tulaga foi lea ona o le vaalele lea e aumai ii Brisbane e le’i atoatoa lona safety e tatou te faaaogaina ai, ua masina atoa o faasolo siaki taua foi lea mo le vaalele i le faaaogaina e le tatou atunuu, e le gata i lena sa faatali foi nisi o vaega spare parts e faaleleia ai le tatou vaalele”.
Na tali le Minisita o le Samoa Airways le afioga ia Leatinuu Wayne Sooialo i lea lava mataupu ma faapea “E le’o le mafuaaga o laisene, o le mafuaaga o le tupe e faatau ai spare parts ona sau loa lea, a maua loa le seleni, o loo iai foi le komiti faapitoa ua uma ona tofia e le Kapeneta e iloilo le tulaga lea.
O loo iai foi laui’a o le tatou malo sa iloiloina muamua le tatou vaalele iai latou o loo galulue i le tupe faaopoopo atu iai ma se finagalo foi ma ni manatu o lenei itu ona maua ai lea o le iuga o le tatou vaalele ae le toe umi, masalo o lea vaiaso”.
