E 17 fale palota ma fale palota faasavali e lua ua faailoa e le ofisa o le Komisi o Faigapalota o nofoaga ia o le a faagasolo ai le faiga filifiliga a le itumalo Vaimauga 3 auā lana palota laititi i le aso 22 ma le 24 o le masina nei, le Aso Lulu ma le Aso Faraile lea o le vaiaso asau.

O ia fale palota ua atofaina mo le palota muamua poo le pre-polling i le aso 22 o maota o ekalesia EFKS i afioaga o Faatoia, Tanugamanono ma Vailima.

O fale palota i le aso 24 o maota o le ekalesia EFKS, ma le ekalesia Metotisi i Magiagi, maota o ekalesia EFKS i afioaga o Faatoia, o Matautu tai ma Matautu uta i Apia, maota o le ekalesia AOG poo le Assembly of God i Leonē, maota o le EFKS ma le Metotisi i Tanugamanono, maota o le EFKS i Loimata o Apaula, maota o le Metotisi i Papauta, maota o le EFKS i Vailima ma maota o ekalesia Katoliko i Vailima ma le Katoliko Divine Mercy i Malololelei.

O le falemai i Motootua ma le nofoaga o tamā ma tina matutua i Mapuifagalele o fale palota faasavali ia mo le motu o Upolu, ae o le maota Samoa o le Matagaluega o Tina ma Tamaitai atinae o afioaga ma aga fesootai i le taulaga i Salelologa o le fale palota faapitoa mo le motu o Savaii.

O loo faagasolo pea talaiga faaatosina a sui tauva e toatolu e aofia ai sui o le faatuatua i le Atua Samoa ua Tasi ma le vaega e puipuia aiātatau a tagata ma le sui faatu tutoatasi, ma o loo iai pea aso e faatino ai ia talaiga faatosina mo tagata palota.

E tatau ona ta le 12 o le aoauli i le tu tonu o le la o le Aso Lua asau le aso 21 o Fepuari ua taofia uma ia faatosina e le gata o auala o faasalalauga i leitio ma televise, o luga o fesootaiga o upega tafailagi, ma laupapa o loo faatutu solo i nofoaga eseese o le Vaimauga 3 e tatau ona talai uma i lalo.

E iai moliaga mo sui tauva e le tausisia lea aiaiga tāua o faigapalota e saili ai tofi faipule o itumalo i le Palemene.