E 4 i le 6 vaiaso o loo auai atu ai ni tamaitai netipolo mai le atunuu i se polokalame PacificAus Immersion lea o loo faia i Brisbane.
O Tovale Solinuu ma Sweety Chong o loo iai nei i le kalapu netipolo a le Jets na ta’ua ai e Solinuu i se faatalanoaga na faasalalauina e le kalapu a le Jets i lona manatu i lenei polokalame.
“O se avanoa tāua mo a’u e tapu’e foi le tulaga o le taaloga netipolo i Ausetalia aemaise lava le kalapu lea ou te iai faatusatusa i le tulaga o loo iai foi taumafaiga o le netipolo i Samoa eseese lava.
“E le gata i toleniga ae tilotilo foi i le itu tau faiaoga o loo mafai ai ona maua le avanoa e fesoasoani mai ai foi lenei polokalame i metotia e fesoasoani ai i ‘au i le atunuu.
“O le aogā ma le auga lena o lenei polokalame mo ma’ua e le gata e mafuta ma faasoa mai foi nai uso o le kalapu a le Jets i vaega e faaleleia ai a tatou teine i Samoa auā a mafai e ‘au Ausetalia na atina’e le netipolo i o latou tagata e mafai foi e tatou ‘au ona atina’e le taaloga i o tatou laufanua.”
O Solinuu na amata mai lona fiafiaga i le netipolo a o aoga ai i le Tulagalua a Sagata Maria ma faaauau ai lava i luga i le Kolisi o Samoa.
O lenei polokalame o loo mafai ona fesoasoani ai le Ofisa a Ausetalia i Samoa nei ma le Netball Australia i avanoa nei e faalauaitele ai le tomai ma agavaa o alo ma fanau taaalo a le atunuu i atunuu mamao.
