O le lāgā e le sui faipule o le itumalo palota o Sagaga numera tasi le afioga Loau Solamalemalo Keneti Sio i lana saunoaga faalauaitele i le tala o le tupe, o sana taumafaiga na feiloai ai ma le tamaitai Palemia e teuteu le mataupu i le faitioga a le Sui Palemia na ave i le fofoga fetalai faasaga i le faipule o Lepa ma le faipule o Faleata 3.

O le finagalo o Loau i lana saunoaga e autu i le tāua o le galulue faatasi, fealofani ma feoeoea’i o sui usufono uma o le maota ae faasifa se vaega o lona finagalo i lona faailoa i le Palemene, pe ana leai le faitioga a le sui faipule o Gagaeamuga numera muamua e le toe aliali mai tulaga ua ave ai nisi mataupu i foga a le Malo po’o le faamasinoga. Na tali le Sui Palemia ma ia faailoa e iai mafuaaga o lana faitioga ma o le tiute foi lea o sui usufono uma o le usitaia o tulafono tumau. 

Loau: “E ala ona fai le tala, ona o a’u le tagata sa matuā tigaina ai i le va lea, i le taumafaiga ina ia faapena ona sologa lelei lo tatou malo….La e silafia foi e nisi o le la itu; na ou savali lava ma ou oo i le Tamaitai Palemia i sona finagalo faatupu, ae teuteu faatupu, ioe, le aga faatupu ma le aga faatamalii na ala ai ona ou faia le galuega. E ui i lea, e lē o le Tamaitai Palemia na sasi i la’u lea maitau. Ou te faanoanoa ai leaga e lei nofoia e lē na tusia le tusi, le aso na talanoaina ai le lipoti. Ae sa ta fia tautala a iai. Ae pagā lea, leaga e lei nofoia e le afioga ia Tuala, lē ona le tusi na ala ai ona mafua. Ui i lea o lea ua uma ona taoto i paga foi le tulaga e pei ona iai le lipoti ma aumai. E pei o le agaga lea. Auā ana lē tusi atu Tuala ia te oe, e leai se mea e tupu. …. Pei o le agaga tonu lena. Leaga e naunau ina ia faapena ona maopoopo ma lelei lo tatou atunuu. Ae ua avea la le tusi lea ma mea ua toe laga’ia ai. Lea la ua tatou faalogo lea laa toe o i tai i le faamasinoga ma toe momoli foi nisi o fuafuaga i le faamasinoga. Auā ana faapea e gata ai ii, e uma ai a ii e lē mafai ona toe faia. Ui o lea Tuala, leaga o oe o le Maleola lou maota; e ola i ai le pagota. A lea ua maitau atu, o oe la le mafuaaga. A alu alu suaga a le vaatele ae toe oo i le faamasinoga…… 
 

Tuala: “Leaga o lea ua maitau atu lau afioga, ua saunoa tonu mai lava le sui lea ia te au, ua ta’ua foi tulaga o le matou afioaga, aemaise o malae ma tupua o loo faapea ona iai le tapuaiga a si o matou itumalo aemaise foi si o matou afioaga. O lea e maitau atu, sa e saunoa sa fai sau galuega, agai i le Tamaitai Palemia. O lea foi ua e tuuina mai o a’u lava le mafuaaga o nei mea. Ia ou te lē ‘alo i le ata o le niu; ia e sa’o lau afioga. Ae ou te lē faia se mea e leai sona mafuaga. Ou te lē faia foi se mea e leai sona faavae. O le faavae o lenei mea lau afioga, o le tatou tulafono tumau. Silasila i ai, o le tou tiute lea; o le tiute tauave lea a sui usufono uma lava a le tatou malo. Silasila toto’a iai. Laga na e pipii iina lau tautoga. Faatino ou tiute i lalo o lau tautoga. O lea la ou te faamālūlu atu ai i le sui usufono, silasila lelei i ou tiute tauave. A e lē faia, ia e fai atu foi la’u tusi ia te oe. Ma le faaaloalo lava lau afioga.” 

O le lē auai o le Sui Palemia i le aso na talanoaina ai le lipoti a le komiti o tulaga mamalu ma aloa’ia a le Palemene lea na talia ai le latou fautuaga e faamālōlō lē tumau le susuga Tuilaepa ma le tofa Lealailepule seia iai se aso, ona sa faailoa e le tamaitai Palemia le afioga Fiame Naomi Mataafa i le fono usu a le atunuu i le aso lea, sa gasegase le Sui Palemia i āuga o le faama’i Koviti-19.