O le saunoaga foi a le Minisita o le soifua maloloina i le Palemene na ia faailoa ai le mautu o tapenaga mo le amata galue i Samoa o se fomai e faia taotoga faapitoa, e sailia ai mafuaaga o maliu poo se pathologist.
O lea fomai e pei ona faailoa e le afioga Valasi Luapitofanua Toogamaga Tafito Selesele, ua mae’a ona faia iai feutana’iga a lana matagaluega ma le matagaluega o leoleo, ma ua faamaonia e le Kapeneta.
O lea feutana’iga o le a totogi ai le fomai e le matagaluega o leoleo, falepuipui ma le toe fuata’ina ma o le a saunia foi se fale e faamautu ai.
Ua faailoa ai foi e le minisita, e toalua alo o Samoa o loo aooga nei mo faailoga i tomai faafomai mo le faia o taotoga e saili ai mafuaaga o maliu.
E iai le talitonuga o le iai o se fomai tumau e faia ia taotoga o le a vave ai ona faatino ni suesuega a leoleo i ni mataupu tau solitulafono e masalomia ai ma fesiligia ai le mafuaaga o le fano o se soifua o se tagata, ma vave ai ona tuuina atu i aiga ni tino maliu mo sauniga mulimuli.
Ua leva tausaga o feagai le matagaluega o leoleo ma le soifua maloloina ma le aumai i fafo o se fomai e faia taotoga faapitoa, ona ua leai se fomai i Samoa e faatinoina lea galuega pe a faatonuina e le pule o maliu le coroner.
