Ua toe o se aga ona faamae’aina lea o le faamanatuina o le 60 tausaga o le Malo Tutoatasi o Samoa lea na amataina mai le tausaga ua mavae.
O le taeao nei lea na faailo ai le sao tāua a le afioaga o Lepea mo le 60 tausaga ma na tatala aloaia ai i le saunoaga autu a le Afioga i le Palemia o Samoa, Fiame Naomi Mataafa.
“O lea ua tau faaiuiu le faamanatuina o le 60 tausaga o le Malo Tutoatasi, ae o le naunautaiga lenei o le Kapeneta mo lenei faamoemoe ina ia maua avanoa i afioaga ma itumalo e sami lo tatou tutoatasi i o latou lava laufanua.
“E avea foi ma laolao lelei e mafuta faatasi ai aemaise lava i le iai faatasi o nai o tatou mātua tausi ma fanauiti.
“A faitau se atunuu i se aiga malosi ona faapea lea o se aiga maopoopo e malu ana measina ma e atagia ai le taitaiga a le Sa’o ma matai o sea aiga.
“O se afioaga foi e malu ona pulega ma amanaia sao o tagata o le nuu ma taunapa i le alofa ma le fetausia’i, e soifua fiafia ma ola atia’e tagata uma ona tafe lea o faamanuiaga auā e afua mai mauga manuia o se nuu.”
Na saunoa foi le Afioga Faumuina Opapo Oeti e tali fuaitau i le saunoaga a le Malo i le faamoemoe o lenei aso.
“Ua loa lava ona silafia le tautua Malo o lo matou tamā, le Afioga i le uluai Palemia o Samoa, Faumuina Le Tupufia Mataafa Fiame Mulinuu II o le tama Aiga, o le tama foi o lenei aiga ma le afioaga.
“O lana saili malo lea ua faitau ai Lepea ma Faleata i le talafaasolopito o Samoa.”
O lenei faamoemoe e aofia ai savali faaaloalo a nisi o aoga oloo i totonu o le itumalo aemaise le afioaga o Lepea sa taitaiina e le faili a alii malu o le Malo.
