A o tapena ai Samoa mo le Fono a taitai o malo o le taupulega ia Oketopa, o loo laualuga i ia tapenaga le saogalemu o malo o le a afifio mai i Samoa.

Ona o lea tulaga ua lē masino ai le mau aoaoga o loo feagai nei ma le Matagaluega o Leoleo ina ia mautinoa e maua le agavaa, le malosi ma faaoloatauina auā lea faamoemoe e lē o se tulaga laitiiti i le vaai mai a le lalolagi.

I le vaega lava ia o le puipuiga sa maua ai se aoaoga na faatino lea e le vaega o le puipuiga a le setete o Nevada i Amerika, sa mafai ona auai i lea aoga nisi o ofisa sinia o le Matagaluega o Leoleo atoa ai ma le 30 alii ma tamaitai leoleo o le Matagaluega i Samoa nei. 

O aoaoga e iai le faasoa o tomai ma agavaa, faapea fuafuaga faataatitia mo le mafai ona faafoe ituaiga faamoemoe tetele ma ia mautinoa e malosi le puipuiga.

O se faasoa ua faailoa le maua lelei ai o lea sootaga tāua ma lea setete ua mafai ai ona ofo mai lea fesoasoani.

O le vaaiga aoao o lea faamoemoe ma o loo laualuga lava i ia taumafaiga, ina ia faamautinoa le saogalemu pea o le atunuu lautele i le taimi o lea fonotaga, ma ia mafai ona puipuia mai soligatulafono e ono tutupu i lea taimi.