O le Aso Sa lea sa amatalia ai le tauvaga o tamaitai lalelei o le Pasefika o loo faia i Nauru ma o loo auai iai le tausala o Samoa ia Moemoana Safaato’a Schwenke.
O le amataga o le pololakame sa faia le se’i, mo numera e faatulaga ai tamaitai auā le tauvaga, atoa ai ma le autu o le a faia iai le faaaliga o finagalo o tamaitai tauva o le Pasefika.
O le tausala o Amerika Samoa e numera tasi i le faatulagaga lona lua iai Toga lona tolu Palau lona fā le tausala o Nauru, o le tamaitai Papua Niu Kini i le lona lima, Marshall Island i le lona ono ae lona fitu ai le tausala o Samoa.
O le mataupu tau Atinae o Turisi na se’iina e le Tausala o Samoa e faaali iai ona manatu ma lagona, o le Aganuu na se’iina lea e le Tausala o Amerika Samoa.
O le autu tau i Aoaoga o le a faaalia iai le finagalo o le Tausala o Toga, o le Siosiomaga ua mautu atu i le Tausala o Palau, o le Tausala o Nauru i le autu o le Soifua Maloloina, Ituaiga Tutusa o le a lauga ai le Tausala o Papua Niu Kini, ma le Tekonolosi o le a saunoa iai le Tausala o Marshall Islands.
O le Tausala o Samoa o loo malaga faatasi ma le Ofisa Sili o Pulega o le Faalapotoptoga o Tagata tafafao maimoa mai Samoa faapea le Onomea Production aemaise ona māua le tamaitai sa avea ma Tausala o Samoa ma le Pasefika ia Mary Jane Moe McKibbin ma lona alii o Fred Schwenke.
