Oloo ua amatalia nei fonotaga a Minisita a le Pasefika oloo gafa ma le vaaia o vaega tau i faamatalaga ma auala faatekonolosi lea oloo auai ai foi Samoa.

O le autu o lenei fonotaga ina ia mautinoa le galulue faatasi le Pasefika ina ia manuia le faaaogaina e o tatou tagata o nei tekonolosi faaneionapo.

Ile tatalaina o lenei fonotaga na saunoa ai le Palemia o Papua James Marape e unaia ai sui usufono ina faasoa ma faaleo vaega e ao ina silafia e faaleleia ma agai ai luma vaega tau tekonolosi aemaise i auaunaga oloo faaaogaina ai auala faatekonolosi.

O se faamatalaga mai le Minisita Toelupe P Onesemo e mafaia lava ona manuia se taumafaiga peafai e galulue faatasi.

“A manuia ona faatino se atinae o atunuu ile faaogaina tatau o auala tekonolosi faaneionapo e afua mai lea i taitaiga lelei, o lo tatou naunau e galulue soosootauau ma faipaaga faatasi e iai le mautinoa toto’a e manuia lena taumafaiga.”

“Ia o tatou sapaia nei avanoa le aumaua oloo tatou sapasapaia ai le fesoasoani a nei auala faatekonolosi e fai lea ma taiala mo se Pasefika saogalemu ma manuia i aso oi luma.”

O mataupu uma oloo talanoaina i lenei fono e fefaasoai ma fetufaai manatu i auala e siitia ai le tulaga lelei male maualuga o le faaogaina o tekonolosi faaneionapo i soo se atunuu ole Pasefika aemaise o auala e foia ai mataupu oloo tutaia ai auaunaga i lea vaega o atinae.