Ua lata i le 20 tausaga o galue le faletua o Pativaine Petaia Tevita i le Pulega o Tagata Tafafao i le vaega o auaunaga lautele o loo avea ai ma faauluuluga o lea vaega, ae sa finau na te maua le tofiga Ofisa Sili i tausaga ua tuanai ae sa lē faamanuiaina.
Peitai ua ia lagona le agaga faafetai ua tau lau o lona taumafai ina ua filifilia e avea ma faauluuluga poo le Ofisa Sili o le Pulega o Tagata Tafafao, o se tasi o auaunaga tāua i le atiina a’e o le tamaoaiga o Samoa. Sa maua se avanoa e fesiligia ai o ia i le afiafi o le Aso Lua e tusa ai ma lona valaauina e ta’ita’i lea vaega o tautua a le Malo, ina ua mae’a ona faalauiloa e le ta’ita’i o le Malo lona filifilia.
Se faatalanoaga ma le Ofisa Sili filifilia fou o le Pulega o Tagata Tafafao le faletua o Pativaine Petaia Tevita. O le tasi o tamaitai ua filifilia e avea foi ma Ofisa Sili o le pulega o le Matagaluega o Fesoota’iga a Faamatalaga Tekonolosi o le afioga Lefaoalii Unutoa Fonoti, sa avea foi ma Pule Faatonu poo le Regulator i ni tausaga ua mavae.
Ua sui tulaga o ia i le susuga Fualau Talatalaga Mata’u Matafeo sa avea ma faauluuluga o lea matagaluega i le tolu tausaga ua mavae. Ae mo le Ofisa Sili fou o le Pulega o Tagata Tafafao, ua sui tulaga o ia i le susuga Faamatuainu Lenata’i Su’ifua sa seei foi i le tofiga i le tolu tausaga ua tuanai.
