Ua amata aloaia tiute o le Faatonusili aoao fou o le Matagaluega o le Soifua Maloloina, i se sauniga i le Aso Tofi o le vaiaso nei na auai le Minisita ma le pulega o lea matagaluega tele a le Malo.

O le susuga Aiono Dr Alec Ekeroma na filifilia e avea ma faauluuluga o le matagaluega a o avea ma pule sili o le Iunivesite Aoao a Samoa.

O se tofiga na ia tuua ma faia ai se latou faamavaega ma le pulega o le iunivesite i le mae’a o aso malolo o le tausaga Fou, ina ua mae’a le 3 tausaga o lana konekarate.

Ua faailoa e le Faatonusili filifilia fou o le soifua maloloina, e le faigofie lana pitolaau i le tele o luitau ae e faalagolago ma faamoemoe i le galulue faatasi uma o fomai ma tausi soifua ma le aufaigaluega e faaleleia faaletonu ma siitia le auaunaga ma le tautua mo se atunuu soifua maloloina lelei.

O le susuga Aiono Dr Alec Ekeroma o loo umia faailoga ma tomai aoaoina i le galuega faafoma’i.

Ua suitulaga o ia i se tasi o fomai sa tauaveina le tulaga Faatonusili le tofa Leausa Dr Take Naseri.