E 4 tausaga ua faasalaina ai e le Faamasinoga Faaitumalo i Aukiani i le Aso Gafua, 7 Aperila 2025 se alii Samoa, o se tagata faipisinisi i Aukilani, ina ua ia ioeina ona moliaga e 5 o le solia o tulafono o le faia o visa malaga, o moliaga e 6 o le faileagaina o ni tagata na faimalaga mai i ni auala faasolitulafono, ma le isi moliaga e tasi o faiga pi’opi’o o se tagata faigaluega.
Ua faatonuina foi e totogi le $4,000 i tagata na afaina ai i le solitulafono a lenei tagata faipisinisi.
O loo faamaonia ai foi ma le solitulafono a se isi tagata na auaufaatasi ma lenei faipisinisi, ma o loo faatalia nei le aso e lauina ai le faasalaga mo lena tagata lona lua.
E tusa ma le lipoti a le 1News, o lenei soligatulafono na amata faatino i le va o le tausaga e 2014 ma le 2021, ina ua faafaigaluega faasolitulafono e lenei tagata faipisinisi ma lana paga na la auaufaatasi, ni tagatānuu Samoa, ma lagolago foi i nisi e faia ni auala solitulafono e maua ai ni visa malaga e aumai ai nei tagata mai Samoa e faafaigaluega i se pisinisi valifale i Niu Sila.
O loo taofia le faailoaina faalaua’itele o le igoa o lenei tagata faipisinisi, ma o loo ta’ua i nisi lipoti o se faafafine, ma e tusa o se faamatalaga a le Acting General Manager Immigration Compliance & Investigation, Michael Carley, na ia ta’ua ai, e masani ona malaga lenei faipisinisi i Samoa e sa’ili mai ni tagata e faafaigaluega i lana pisinisi valifale.
Ua ta’ua i le lipoti, le faaseseina o nei tagatānuu Samoa, i folafolaga taufaavalea e lenei faipisinisi, o le a tele tupe latou te maua ma fesoasoani ai foi e lafo tupe mo latou aiga i Samoa.
E mautinoa sa silafia lelei lava e lenei faipisinisi e solitulafono le faafaigaluega ai i totonu o Niu Sila o nei tagata na malaga mai Samoa i visa asiasi, ma oo foi ina ova aso ua nonofo ai pea nei tagata i Niu Sila ae ua uma le aogā o visa na omai ai.
O le isi solitulafono o lona faatogafalea o se tagata e faigaluega i le ofisa o femalagaa’iga a Niu Sila i Apia, o ia lea sa fesoasoani i le apalaiina ma faafaigofie ai ona maua visa nei na malaga mai ai tagata i Niu Sila.
O nei tagata sa faafaigaluega mo le sili atu i le 40 itula i le vaiaso, i se totogi e $100 i le aso, o se totogi ua matuā maulalo lava nai lo le totogi maulalo faatulafonoina e totogi ai se tagata matua faigaluega.
E leai ni totogi mo aso mālōlō o nei tagata faigaluega ma e lē agavaa foi i ni aso ma’i, ma na ta’ua i le lipoti, e leai ni pepa e faailoa atu ai le faatulagaina o totogi o nei tagata (payslip), ma e le’i faia foi ni a latou maliega poo ni konekarate faigaluega.
O le tula’i mai o lenei mataupu ua toe faamamafa mai ai e le faamasinoga le ogaoga o lenei solitulafono o le faileagaina poo le faafaigaluegaina faasolitulafono o ni tagata e aumai i totonu o Niu Sila.
Puna o Faamatalaga: https://www.1news.co.nz/2025/04/07/samoan-national-jailed-for-migrant-exploitation/
