Ua faailoa e le pulega o tagata tafafao maimoa mai i Samoa le faaauau pea o tulaga lelei i le toe siitia o lea atinae tāua e pei ona faamauina i le numera o tagata e malaga mai e tafafao i lo tatou atunuu mo le 3 masina mai ia Iulai e oo mai i le faaiuga o Setema o le tausaga nei.

Sa faamauina ai le aofaiga e 48,620 o tagata sa ulufale mai i le atunuu ma faamauina ai se aofaiga o tupe na sasaa mai ai e 158 tesimale 3 miliona tala.

O le saoasaoa o le tulaga faaleleia o le atinae o tagata tafafao ua faamauina ai foi le faatupulaia pea o tulisi mai isi atunuu e malaga mai ma avea Samoa ma atunuu e fia tafafao mai iai ma faaalu ai a latou seleni.

Ua faailoa e le pulega o tagata tafafao e tusa ma le 422 miliona tupe na maua mai i le atinae lenei mai le masina o Ianuari e oo mai i le faaiuga o Setema o le tausaga nei.

O loo molimauina pea le toatele o o tatou tagata o aumau ma nonofo i fafo o loo malaga mai talu mai le masina o Aokuso o le tausaga ua mavae na toe tatala ai tuaoi o Samoa mai puipuiga o le faama’i Koviti-19.