Ua faateteleina tulaga lē manuia ma vaaiga lē talafeagai ua faia aga’i i le komiuniti o tagata Isaraelu i Ausetalia.
O se faamatalaga lea mai se tasi o o latou ta’ita’i ina ua alafa’i mai i le taeao analeila i nisi foi tusitusiga ma faamatalaga ua faia faasaga ia Isaraelu ua spray i luga o fale i le faaitu o Woolhara faapea foi ma se taavale ua susunuina.
O le faamatalaga a leoleo o le te’a o le tasi i le vaveao analeila na valaau ane ai le latou fesoasoani i le nofoaga lea i Magney St i le itu i Sasae o Sini, na maua atu iai se taavale ua susunuina faatasi ma se isi taavale ma fale e lua e latalata ane ua tusitusia ai faamatalaga e faatatau ia Isaraelu.
Fai mai o loo fia talanoa leoleo i ni tagata se to’alua e talitonuina sa iai i le faaitu lea i le taimi o le faalavelave, ma ua faamatalaina e talavou le to’alua lea e i le va o le 15-20 tausaga le matutua ma sa laei ofu pa’auli ma pupuni o la foliga.
O se faalavelave ua faailoa ai le lē fiafia o le Premier o le setete, Chris Minns ma ia ta’ua ai o le a matua’i tali atu leoleo i lenei mataupu.
Ua faailoa foi le faanoanoaga o le alii Palemia, Anthony Albanese ma ia ta’ua ai e matua’i leai se avanoa o ni faiga poo ni uiga faapea e faia i totonu o le komiuniti.
Puna o Faamatalaga: https://www.9news.com.au/national/vandalism-car-fire-antisemitic-graffiti-woollahra-sydney-east/9b7ec846-4e1b-4713-9774-d62210b9e85c
