E fiu e faailoa ma faalumaluma tagata o loo paka faasolitulafono i pakaga o loo faaavanoa mo i latou e iai mana’oga faapitoa ma faigata ona paka mamao, e lē o tuua ai lava.
I meapu’eata faalilolilo a le Fair Go na faapipii i Aukilani na maua ai le to’atele e leai ni pemita ae paka lava i avanoa ua mae’a faailogaina.
E silia ma le 150,000 Kiwis o loo umia pemita mo nei paka ma o loo iai le faamoemoega o le a alualu pea i luga.
I pakaga o loo i nofoaga lautele o loo i le council le faitalia e faasala ai, peitai i nofoaga o loo umia tuto’atasi e aofia ai malls ma supamaketi e leai ma ua sau ai le talosaga ia ave le pule e mafai ai ona faasala e i latou o loo vaaia pakaga i nofoaga umia tuto’atasi.
O le masina lenei ua faatū ai le matagaluega fou faapitoa mo tagata e lē atoatoa le malosi, ma ua iai le faamoemoega ia mafai e lea matagaluega ona fesoasoani i le komiuniti o tagata e iai mana’oga faapitoa e aofia ai ma pakaga nei.
