O loo faaauau pea ona mata’itū e militeli a Niu Sila ma Ausetalia vaatau a Saina lea o loo i le Tasman Sea.
E 350 maila le mamao mai Matu i Sasae o Ausetalia lea e oo mai i le afiafi ananafi o iai vaa nei e tolu a Saina, ma o lea ua silia ma le vaiaso o iai pea i ogasami tuaoi nei o Niu Sila ma Ausetalia.
O vaa foi nei e tolu ua faamautinoa mai e le minisita o le Defence Force a Niu Sila, Judith Collins, o lea lava ua omai e aunoa ma se tala manino mai ia Saina poo le ā le mafua’aga ua omai ai i ogasami i le itulagi o loo tatou iai.
Peitai, o le Aso Faraile faato’ā uma atu na lapata’ia ai e le militeli a Saina le faigamalaga a le Emirates e sau mai Sini, Ausetalia i Kalaiesetete ina ia taumamao ma le alavaa ona o faata’ita’iga a vaatau nei e tolu a Saina.
E oo lava foi i kamupani vaalele a le Jetstar faapea le Ea Niu Sila, o lea na suia alavaa e uia ina ia taumamao ese ma le ala ua faailoa mai.
E ui i lipoti nei, ae lē o mafai ona faamautū mai e le minisita o le Defence Force a Niu Sila pe faamaonia.
Ae i se tali mai a Saina ananafi, e tauala mai le sooupu a le matagaluega o le Defence Force i Saina, Wu Qian, o loo ia tuua’ia ai Ausetalia i lona faifai tala i faata’ita’iga a vaatau o loo faia nei.
Ua fai mai ai ma le sooupu o lea lava na silafia e Ausetalia ma o loo mulimulita’ia lava e Saina tulafono uma faavaomalo.
Puna o Faamatalaga: Explainer: What are the Chinese naval vessels doing in the Tasman Sea? | RNZ News
