Ua faamaonia mai e le Faamasino Sili afioga Satiu Simativa Perese o le a faaauau pea le valaauina o tagi i mataupu faatosina o le Palota e 28 i luma o le faamasinoga.
I minute na tuuina atu i le Samoa Law Society ma le Ofisa o le Loia Sili ua faaulutalaina “ Minute faatatau i tagi o le faigapalota ma mataupu i le va o le FAST ma le Ofisa o le Loia Sili, mataupu o le Ofisa Faiga Palota ma le Aliimalemanu Moti Alofa Tuuau” na faapea ai “ o mataupu ia e patino i le faamasinoga maualuga ma ua mautū”.
Na ia taua foi ua faatonuina le faamasinoga e faauaua pea le tapenaina o tagi e 28 mo le valaauina.
Taua e Satiu “ o soo se tasi e mana’o e ave i tua le latou tagi , e tatau ona tuuina mai se tusi talosaga i lalo o le tulafono o tagi o le Faigapalota 1964. O le isi valaauga o tagi o mataupu faatosina o le palota o le a faia i le Aso 12 Me 2021.
Ua mautinoa i le saunoaga a le Faamasino Sili e ui ua malele le Ao o le Malo e faaleaogaina le Palota na maea nei e lē taofia ai le galuega tutoatasi faaletulafono a le faamasinoga maualuga.
