Ua lē manuia le talosaga toe iloilo poo le apili i le Faamasinoga Maualuga a Samuelu Su’a e iloa foi i le isi suafa o Fauena Toese, sa toe finau ai e tatala i tua i ni aiaiga, e faatali ai lona faamasinoga ua faatulaga e valaau molimau i le masina o Me o le tausaga fou 2025.

O le faai’uga o le vaiaso na faailoa mai ai le faai’uga a le afioga i le faamasino sinia o le Faamasinoga Maualuga sa iloiloina le talosaga apili a Samuelu, sa toe lu’i ai le faai’uga a le Faamasinoga Faaitumalo na teena ai le tatala i tua o Samuelu ma lona toalua o Sivai.

Peitai na talia e le Faamasinoga Maualuga i se faai’uga le tatala i tua o lona toalua ae faaauau pea ona nofo taofia Samuelu i le taimi lea o loo faatulaga le valaauina o molimau o lea faamasinoga i le masina nei o Aokuso.

O le toe lu’iina o le faai’uga a le Faamasinoga Faaitumalo i le tolo atu i le tausaga fou o suesuega ona o loia mai fafo mo Samuelu ma isi e toafā o loo molia faatasi e faato’ā avanoa i le tausaga fou, na mafua ai ona talia lea talosaga e pei ona faatulaga o Me o le tausaga asau e faato’ā suesue ai tuua’iga o Samuelu ma isi e toafā e aofia ai lona toalua o Sivai, o le faipule o le Palemene afioga Fepuleai Faimata Su’a, o Li’o Faataumalama Auava ma Lise Marie Schmidt.

I le faai’uga a le faamasino sinia o le Faamasinoga Maualuga le afioga Vui Clarence Nelson ua teena ai le tatala i tua o Samuelu ona e iai le faaeteetega i le lē oo atu i le faamasinoga i le taimi e valaau ai molimau.

Ua talia foi e le faai’uga le finauga a leoleo i le ono faalavelave o lē ua molia ia latou molimau pe a tatala i tua.

Ua faamaonia e le faamasinoga i le iloiloina o le talosaga apili mo le tatala i tua o lē ua molia, e leai ni aafiaga tau soifua mālōlōina o Samuelu.

Talu ai le ono lamatia o le puipuiga o lē ua molia, a o nofo taofia ai i le vaaiga a leoleo, ua faatonuina e le faamasinoga le pulega o le falepuipui ina ia vavae ese Samuelu ia aua ne’i mafuta faatasi ma isi o loo nonofo taofia i le falepuipui i Tanumalala.

E iva masina ua faaauau ai ona taofia o ia seia aulia le masina o Me o le tausaga fou e faato’ā avanoa ai loia mai fafo o le a finauina moliaga o Samuelu ma isi e toafā.