O Lotofaga ma Matatufu sa fetaia’i tagata o loo alala ai ma faafitauli i le faaletonu o fesootaiga televavave faaonaponei e faasino i le initaneti.
Peitai ua faailoa e le pulega o le kamupani o le Digicel Samoa, ua foia lea faafitauli ina ua faaaogā nei se pou fou o fesootaiga a le kamupani ua faatuina i totonu o le itumalo o Lotofaga o loo avea ai le tamaitai Palemia ma o latou sui faipule i le Palemene mo le tele o tausaga, le Afioga Fiame Naomi Mata’afa.
E 850 tagata o loo alaala i Lotofaga ma Matatufu e pei ona faailoa e le pulega o le Digicel i le taunuu o se latou suesuega na faia poo se survey, ma o tagata uma ia o le a lē toe aafia fesootaiga tau initaneti e faaaogā ai telefoni feaveai ma isi masini faatekonolosi e pei o computers, auā ua amata faaaogā nei lea pou o fesootaiga na tatala aloaia i le Aso Tofi o le vaiaso nei, lea sa ooti ai e le tamaitai Palemia le lipine e aloaia ai le tatalaina o lea pou o fesootaiga a le Digicel.
O nuu e tuaoi ma Lotofaga ma Matatufu aemaise o pisinisi o loo iai i lea vaega o le motu o Upolu, o le a faaleleia ai foi a latou fesootaiga faainitaneti i le pou o fesootaiga ua tatala ma faaaogā.
O le Digicel Samoa o se tasi lea o kamupani telefoni ma fesootaiga i lo tatou atunuu o loo tautuaina pisinisi eseese ma tagata i Samoa i auaunaga tau telefoni feaveai ua iai ma fesootaiga faaonaponei le initaneti, ua faaaogā e maua ai fesootaiga ma isi atunuu aemaise o o tatou aiga o aumau ma alaala i atunuu mamao.
