E lē o solomuli le matāgaluega o leoleo i le faagasolo o a latou polokalame ua faaaogā ai auala o faasalalauga, o feiloa’iga ma autalavou ma ekalesia i le molimoli iai o le tala’iga i le mata’utia o le tagofia o fualaau faasāina.
O le fai atu leai i fualaau faasāina o le mau tauave lea o loo autū iai le polokalame a le matāgaluega o loo molimauina ia latou faasalalauga e pei ona sa amata ai mo le taimi muamua lea taumafaiga i le masina o Oketopa o le tausaga nei ma le faamoemoe e 12 masina e faagasolo ai.
O le taulamua o le matāgaluega o leoleo falepuipui ma le toe fuata’ina i le faia o lea polokalame ua tūtūaai ai foi ma le matāgaluega e māta’itū lana auaunaga mai le tagofia o fualaau faasāina e pei ona iai se faiga faavae o loo tapena.
O le faatāua o lea tulaga ua faamautū i le faailoa e le sui komesina o leoleo i se lipoti, le faamālōlō ai o se leoleo sinia ina ua faamaonia lona faaaogā o le laau faasāina o le maruana, ae o le isi ofisa sinia ua faamālōlō ona o le tagofia o le ‘avamalosi.
