Ua vave nei ona maua faaiuga o suesuega faafomai i le sailia o mafuaaga o ni tagata e maliliu, ina ua maua le fesoasoani mai fomai faapitoa poo forensic pathologist mai le atunuu o Fiti.
Ua faailoa e le tamaitai sui komesina o leoleo susuga Papalii Monalisa Tia’i Keti, o le latalata mai o Fiti ma le totogi o le faaaogaina o ia fomai ua fesoasoani i tupe alu a le Malo e aumai ai ni fomai faapitoa e faia taotoga e saili ai mafuaaga o maliu mai Niu Sila ma Ausetalia, ma o lea suiga ua le toe manaomia ai le fesoasoani a fomai faapitoa mai Saina.
Le sui komesina o leoleo susuga Papalii Monalisa Tia’i Keti. O le finagalo o le sui komesina na faailoa i le feiloaiga ma tusitala e pei ona toe faaauau ia feiloaiga i vaiaso taitasi i le tuanai o ni tausaga sa le toe faia ai.
O le feiloaiga foi i le Aso Lulu ma le sui komesina na ia faailoa ai, o le faila o suesuega i le tagi a le Minisita o Galuega Tetele o loo tuuaia ai le taitai o le itu agai i lona faia o ni tala sese ma tau faaleaga, e lei oo atu lava le faila mai le Loia Sili a le Malo lea na ave iai ua tusa nei ma le tolu vaiaso, e toe silasila i le suesuega ma le fautuaga a leoleo ina ia faia ni moliaga faasolitulafono.
