Ua lalata ina aulia le selau tausaga o le auaunaga a le leitio o le 2AP o se aseta tāua a le Malo na faavae i taimi o pulega faakolone sa maua ai e le atunuu faamatalaga eseese i galuega o le atina’e o le Malo, o faafiafiaga, tala fatu ma tala faafagogo ma fatuga o pese Samoa.
O loo iai pea nisi o fatuga o pese tuai ma isi polokalame o loo teu malu pea e le leitio, auā o nisi o ia meatotino na faaleagaina i afā o tausaga ua tuanai, ina ua afaina le fale tuai sa iai lea auaunaga o fesootaiga.
O le polokalame fesoasoani a le Malo o Ausetalia le PACMAS ua na faatupe se fesoasoani e faatumau ai pea le lelei o ia fatuga o pese Samoa ma polokalame o loo teu e le leitio, e faaaogā ai faiga faatekonolosi faaonaponei ua ta’ua o le digital.
O le vaiaso nei o le a galulue ai alii inisinia ma le au fai polokalame a le leitio, ma se alii poto faapitoa mai Papua Niu Kini, mo le tuu faatasia o pese tuai ma polokalame mai tausaga ua mavae, mo le auina atu i fafo mo le faia iai o le galuega o le toe faatumau o le lelei o ia polokalame ma fatuga, ona teu malu lea i faiga faatekonolosi faaonapo nei ina ia faatumau ai pea ona maua aemaise o le lelei mo le faaaogāina.
