O le asō ua maua ai se lipoti e faapea o se tasi o alo o Samoa lea sa avea ma kapeteni o le Black Ferns, Fiaoo Faamausili o le a faaaofia i le World Rugby Hall of Fame i se sauniga faapitoa o le a faia i le taimi o le Ipu o le lalolagi ia Novema.
O Faamausili o se tasi o tamaitai iloga i le taaloga lakapi ma e lima taamilosaga o le Ipu o le lalolagi sa tausinio ai ma manumalo i taaloga e fa a o avea o ia ma kapeteni o le ‘au.
Fai mai le RNZ Pacific e na o ia le tamaitai Niu Sila o loo aofia ia i latou o le a faaaofia i lea sauniga ma o ia foi e aupito talavou ai mai le toaono o le a faaaofia.
I le tausaga tonu na litaea ai Faamausili mai le taaloga na ia mauaina ai foi le faailoga taualoa o le Officer of the New Zealand Order of Merit ma sa faatuina foi lona suafa e avea ma teine taalo o le taaloga.
O loo galue Faamausili o se malu o le malo i le itumalo o Counties Manukau ma o ia foi le uluai tamaitai ua umia le avanoa o le peresetene a le Auckland Rugby.
