I le savalia ai nei o le 81 tausaga o le soifua o le afioga Le Mamea Ropati o loo ia umia foi suafa matai o le Tapusatele, Lemalu, Leatuavao, Tuiletufuga ma Su’a, o le avea ai o ia ma ulua’i tamafanau a Samoa na faauu mai ma ona faailoga foma’i i le tomai o le suiina o vailaau mo le togafitia o gasegase mai le Iunivesite o Otago i Niu Sila i le tausaga e 1970, ua faaee atu ai nei e le pulega o lea iunivesite se faaaloalo maualuga o se faailoga taualoa i lea tamālii o Samoa sa avea ma ta’ita’i o le malo i le tofi faipule o le Palemene, minisita o le Kapeneta, ta’ita’i o le Itu Agai ma o se tasi sa filifilia i le tofiga o le Sui o le Fono a Sui Tofia poo le Sui Ao o le Malo.
Ua faailoa e le iunivesite i lana upega tafa’ilagi o lea faailoga ua ta’ua o le Distinguished Alumini Award ua amana’ia ai i se tulaga taualoa e lea iunivesite le sao o lea tamālii o le atunuu i le auaunaga faasoifua mālōlōina faapea a’oa’oga.
O lea tamālii a o avea ma Minisita o A’oga sa lotolotoi i le amataina o tapenaga o le faatūina o le Iunivesite Aoao o Samoa, o lona taliu mai foi i le atunuu i le mae’a ai o a’oa’oga ma maua ona faailoga i tomai tau i le suiina o vailaau faafoma’i mo togafitiga sa galue ai i le matagaluega o le soifua mālōlōina.
