O loo ta’ua i lipoti a le BBC i le asō le sauni o le Palemene a Europa e taofia le ioeina o se maliega tau fefaataua’iga ma Amerika na malilie iai i le masina o Iulai o le tausaga talu ai.
Fai mai o lea tulaga e ono faateteleina ai ni eseesega i le va o atunuu o Europa ma Amerika aemaise ina ua faailoa i lipoti e lē o iai se fuafuaga a Trump e toe taofia le faia o lafoga faaopoopo e totogi e atunuu o loo aveina atu oloa i Amerika.
O le gaioiga a Amerika i le aveina o Greenland e avea ma se vaega o lona atunuu ua tele le mau faamatalaga ua faia ai ae o le maliega na faia ia Iulai sa malilie ai Europa e inivesi i Amerika peita’i la e mana’omia pea le ioega mai le Palemene a Europa ina ia aloa’ia ai lea maliega.
O loo ta’ua o le aso 7 o Fepuari e tatau ona faamamalu ai lea maliega ae o loo fautua ane sui o le matāgaluega o tupe a Amerika ia Europa e lē tatau ona tetee ane i fuafuaga e pei ona faatulaga atu e Amerika.
Puna o Faamatalaga: https://www.bbc.com/news/articles/c4gwp2me3gzo
