Ua folafola mai e Spain, Aialani, Slovenia ma le Netherlands o le a solomuli ese mai ma le tauvaga tele tau musika a Europa le Eurovision ina ua faailoa e i latou o loo faagaioia le tauvaga, o le a faataga ma sui mai Isaraelu e tauva ai.
O le faaaliga tele lenei tau musika i le Atu Europa ma e faatautaia e le European Broadcasting Union ma sa faailoa le fiafia o le Peresetene o Isaraelu, Isaac Herzog ina ua maua lea faamatalaga ae saunoa le minisita o le va i fafo a Isaraelu, Gideon Saar e lagona lona mā i atunuu ua o latou faailoa nei o le a o ese ma le tauvaga.
Fai mai o le fonotaga e faatatau i le matāupu lea na faia i le nofoaga autū i Geneva e aofia ai le aufaasalalau mai atunuu e 56 ma sa o latou iloilo ai suiga ua talafeagai ona faia.
O loo ta’ua i le CNN o loo iai atunuu o loo faailoa popolega i le auai o Isaraelu i le tauvaga ona o le taua i Gaza ma le to’atele o tagata ua ma’umau ai soifua.
Ua faailoa i le lipoti se faamatalaga mai le Faatonu o le tauvaga, Martin Green ua faatino e latou laasaga manino ma tonu e faamautinoa ai e faaauau pea le tauvaga o se faamanatuina o le musika ma le tutū faatasi.
Puna o Faamatalaga: https://edition.cnn.com/2025/12/04/europe/eurovision-israel-participation-vote-intl
