I le mataupu lava lea faatatau i le AUKUS ua faailoa ai se finagalo o se tasi o sui mai le Iunivesite o Aukilani, Dr Marco de Jong e tatau ona faafofogaina leo o le Pasefika i le finauga lea pe tatau ona auai Aoteroa i le AUKUS pe leai.
Ua lipotia e le Leitio faavaomalo a Niu Sila le fai sa’o o faamatalaga ia a de Jong agai i le minisita o le va i fafo a Niu Sila, Winston Peters ma le taofiofi o faamatalaga mai tagata lautele e uiga i le mataupu lea i le AUKUS aemaise o loo alia’e pea nisi faafesili mai le Pasefika e faatatau i lenei maliega.
Fai mai de Jong e faaalu e Peters le taimi i le osofai o isi e tetee i le AUKUS ae ua lē faamanino mai ni mafuaaga e alagatatau ai ona auai Niu Sila i lea maliega.
Ta’ua i le lipoti se isi faamatalaga a Peters e lei valaauina loia Niu Sila e auai i le AUKUS ma e lē o lava foi ni faamatalaga o silafia e faatatau i lea maliega peitai fai mai de Jong e lē o le sa’o lea, a fua i faamatalaga faamauina na faia talanoaga a Niu Sila ma Amerika i le mataupu lea talu le 2021.
O le finagalo faaalia o lē sa avea ma Palemia o Niu Sila i se taimi ua sola, Helen Clark o loo ia ta’ua ai o le auai o Niu Sila i lalo o le AUKUS o le a tuu ai le la mafutaga ma lana paaga faapisinisi o Saina i se tulaga lamatia, ae lē gata i lea o Niu Sila o loo avea nei ma se guardian poo se puipuiga mo le Pasefika i Saute.
O se faatalanoaga foi o le mataupu lea i se taimi ua tuanai ma le Palemia o Samoa, Fiame Naomi Mataafa na ia ta’ua ai, e lē manao e avea le Pasefika ma se faaitu e aafia i nisi auupega faaopoopo faaniukilia.
Puna o Faamatalaga: https://www.rnz.co.nz/international/pacific-news/515876/don-t-mistake-pacific-leaders-quietness-on-aukus-as-support-for-nz-s-position-expert
