Ua tatala aloaia nei se isi auaunaga faaopoopo a le vaega mo le tausiga o le soifua maloloina, le Pasefika Family Health Group, o le latou van o le a fealua’i e feavea’i le faatinoga o le latou auaunaga faasoifua maloloina, le Mobile Clinic Unit.
O le Aso Lua, 30 o Me lea na faatino ai i sina sauniga puupuu le tatalaina aloaia ma faalauiloa lea auaunaga faaopoopo i se tasi o latou nofoaga, le Weymouth Medical Centre i le tuatusi i le 5 Waimahia Ave, i Weymouth.
O le faletua ia Galumalemana Vaifagaloa Naseri o le General Manager, sa faafeiloaia le mamalu o le aofia na afifio atu ma fofola mai le auivi o le faatasiga i lea aso, na la galulue soosoo tau’au ai ma le tina ia Roshni Devi, ona sosoo loa lea ma le saunoaga autu o le aso mai le Taitaifono o le fono faatonu a le faalapotopotoga, le afioga Toalepai Richard Johnston.
O le susuga i le faafeagaiga o le Ekalesia Presbyterian i Otara, Rev Arona Tuisega na faia se upu faaleagaga e tomatauina ma faapaia ai le galuega.
Na sosoo ai ma le ootiina o le lipine ma susu’e loa le ie ina ia faaali atoatoa le foliga o lenei galuega matagofie, a o molimauina e le auvalaaulia, lea na aofia ai foi sui mai isi auaunaga faasoifua maloloina, o paaga ma uo a le PFHG.
Sa maua foi se avanoa o nisi o malo valaaulia na auai faapea sui o le au faasalalau e ulufale ai i totonu o lenei van ma molimautino i le atoaga o tapenaga ua faatotoga ai lenei van mo le faatinoina o auaunaga o le a faia ai.
O le agaga autu o le Pasefika Family Health Group ua naunau ai e faaopoopo lenei vala o le faatinoga o latou auaunaga, e pei ona saunoa Galumalemana, o loo iai lava nisi o tatou tagata Pasefika, aemaise lava i tina ma tamā matutua, o loo nofoa’i ma faafaigata ona augofie le saili atu i auaunaga mo le tausiga o latou soifua maloloina, ae o le mea mautinoa o loo latou manaomia le tausiga faasoifua maloloina.
O lea la na a’e ai se finagalo i le pulega aemaise foi le lagolago mai a faalapotopotoga o loo latou galulue faatasi, ina ia saunia se taavale faapea e faigofie ai ona oo atu le auaunaga i maota ma laoa, e faatino ai lena tausiga, e pei o le faia o siaki faalesoifua maloloina, o siaki o le suka, le toto maualuga, faiga o tuipuipui, o isi gasegase faaumiumi, pe toe tuliloa ni siaki na faia muamua ma foma’i, pe tau lava foi o le faia o ni faatalanoaga ina ia silafia ni faafitauli o ma’i o le tino o aafia ai, lea e tele ina augata e agai i falema’i e talanoa i foma’i, ae o lea la ua latou faafaigofie e ala i le alu sa’o lava le van i le maota o le tagata pe a valaau atu mo se fesoasoani.
Sa fesiligia foi le tulaga pe tatala i soo se tasi lenei auaunaga, ma o le mea moni lena, aemaise lava i latou e lei mautu ni a latou fomai tausi, ae atonu o le a ave foi le faamuamua ia latou gasegase ua uma ona lesitala ia latou.
E pei ona silafia o le auaunaga lenei o loo faasino atu lava i o tatou tagata Pasefika, auā o loo tele lava ina galulue ai alo ma tamafanau a atunuu o le Pasefika aemaise lava Samoa, o i latou ua malamalama lelei, e le gata i tomai faafoma’i e momoli mai ai se tausiga faasoifua maloloina, ae ua malamalama lelei foi i mafaufauga ma aganuu o tagata Pasefika, lea e laualuga ai le faatinoga ma le momoliina mai o le latou tausiga faafoma’i ma faatausi soifua.
O le Pasefika Family Health Group o loo iai le isi ona lala i Panmure i le 136 Queens Road, i Panmure, ma lona lala lea i Weymouth i le 5 Waimahia Avenue, i Weymouth.
