E ono toatele soifua ma’umau ona o le mu o le Loafers Lodge i Ueligitone i le vaveao analeila.
O le tea o le 12 na oo atu ai fuimu i le fale tele lenei o loo nonofo ai le tusa ma le 94 tagata, ma e faapea e taunuu atu ua mu le pito i luga o le fale ma ua iai i se tulaga e ono solo ai i lalo.
O se mu ua faamatalaina e sui o le ofisa o se vaaiga pe ā ma le faatasi i totonu o le 10 tausaga i Ueligitone e vaaia ai, ma o se taeao faanoanoa i le komiuniti ona o se tasi lenei o lodge o loo tele ina faamautu ai le toatele.
E tuufaatasia tala fou ua toe maua le 52 tagata ma i faamaoniga mai le tineimu, o loo tau sailia pea isi ma e ono toatele soifua e ma’umau ai.
Ae mai saunoaga a le Palemia, Chris Hipkins i le itula e 8 i le taeao nei, o lipoti ua oo atu ia te ia e faapea e toaono ua maliliu ai.
I le lipoti a le Stuff i totonu o le itula talu ai o loo toe molimau ai se tasi e nofo i le Loafers Lodge, e eseese uma lava tagata e nonofo i fogafale taitasi o le lodge ma o le pito i luga o loo faamautu ai i latou o loo tulimataia e leoleo ona o soligatulafono faapea ma le au 501 poo i latou toe tipoti mai Ausetalia.
