I le savalia ai nei o le 26 tausaga o avea le afioga Vui Clarence Nelson ma faamasino o le faamasinoga a Samoa, e pei ona sa amata i le Faamasinoga Maualalo lea ua suia nei i le Faamasinoga Faaitumalo, ma siitia atu i le Faamasinoga Sili e pei ona avea ai ma faamasino sinia.
O le masina o Tesema o le tausaga na te’a nei na aulia e lana afioga le 70 tausaga o lona soifua ma ua tatau ai ona faamuta lana tautua e tusa o aiaiga o le tulafono faavae.
Ua faailoa e le Ofisa Sili o le Matāgaluega o Faamasinoga ma le Faafoeina o Matāupu Tau Faamasinoga, o le failautusi foi o le komisi o galuega a le faamasinoga, e 6 masina ua toe faaopoopo e faaauau ai le tautua a le afioga i le Faamasino sinia ma le faamoemoe e mae’a lona taimi galue i le tofi faamasino i le masina o Me o le tausaga nei.
Le susuga Papalii John Taimalelagi Afelē o le Ofisa Sili o le Matāgaluega o Faamasinoga ma le Faafoeina o Matāupu Tau Faamasinoga.
