O lipoti i le asō mai le One News ua ta’ua ai le popolega o le faitau afe o tagata na tuuina iai talu ai nei nofomau i Niu Sila e ono latou misia le avanoa e palota ai i faigapalota faalotoifale o loo loma nei.
Fai mai a itiiti mai pe ā ma le 55 afe tagata na tuuina iai nofomau o loo agavaa e palota ae ua ta’ua e iai nisi ua toe aveese mai le faia o palota ona o le nunumi i tulafono.
O le masina o Setema o le tausaga talu ai na folafola ai e le malo le Resident Visa Scheme lea ma e silia ma le 100 afe i latou ua mae’a ona tuuina iai nofomau e oo mai i le asō.
O le feeseeseaiga i faamatalaga le isi mafuaaga ua faafaigata ai ona maua le avanoa o isi e lesitala ai mo faigapalota faalotoifale aemaise fai mai nisi o auaunaga e latou te lei iloa ua mafai nei loa ona palota i latou ua tuuina iai nofomau i le taimi nei.
Fai mai le faamalamalamaga a le komisi o faigapalota o soo se tasi ua tuuina iai le nofomau ua agavaa e palota pe afai ua silia ma le tausaga talu ona nofo i le atunuu.
