O le telefoni fou a le Apple, le Iphone 14 lea ua faalauiloa mai i Niu Sila ma Ausetalia ua ta’ua i se lipoti i le asō e mafai ona faaaoga se polokalame o loo iai e faaigoa o le Emergency SOS via Satellite e fesoasoani i le faasaoina o se soifua aemaise lava i le tele o nofoaga maotua.
O le masina o Setema i le tausaga talu ai na muai faalauiloa ai le Iphone 14 lea ma ua faaaogaina lea polokalame i totonu o Amerika ae o le asō i Ausetalia i lona faalauiloaina aloaia ua faamanino ai lea fesoasoani mo i latou e fia maua lea ituaiga telefoni.
Ua faailoa e mafai ona fesoasoani lea polokalame i le saiila o se tagata o leiloa i nofoaga ia pe manu’a foi pe poloka i se nofoaga, e mafai ona koneti agai i fesoasoani faavavave poo le emergency.
E na o le ituaiga telefoni lea e maua iai le polokalame ma e fiafia iai nisi ona fai mai ua tele tausaga ua tuanai e oo mai i le asō o tulai mai pea faalavelave ua aafia ai soifua o tagata e leiloloa ma faamanu’alia i ni faalavelave ae semanu e laveai e lea ituaiga polokalame pe ana avanoa mai i ia taimi.
