Ua mae’a ona suesue molimau e 13 a leoleo i le suesueina o moliaga o le leoleo asiasi o loo faamalolo lē tumau, le susuga Li’o Faataumalama Auava ma le tamaitai leoleo tā’ai lua o Henifa Bryce.
Ua faailoa mai e se molimau faatuatuaina o se tasi o loo auai i le suesueina o lenei mataupu, o loo totoe ai nei molimau e 13 o le a suesueina i le Aso Lulu le ogatotonu o lenei vaiaso, ma ua aofia ai ma le Komesina o le matagaluega o leoleo i molimau o loo totoe faatasi ai ma nisi o leoleo sinia.
E lima moliaga o loo tuua’ia ai Li’o Faataumalama lea o loo tulai ai le alii loia Niu Sila o Phillip Morgan o se King Counsel, ae 2 moliaga o Henifa Bryce o loo tulai ai le tamaitai loia o Tanya Toailoa.
O le tamaitai loia tutoatasi le afioga Magele Leone Su’a Mailo o loo finauina moliaga a leoleo.
O le faatinoina e le leoleo asiasi ma le leoleo tā’ai lua o le suesuega o le faalavelave tau taavale na maliu ai le alii talavou o Tuuau Faasavalu e aunoa ma se faatagaga mai le Komesina o leoleo, o le mafuaaga lea o moliaga o loo suesueina nei e le faamasinoga faaleoleo le Police Tribunal.
