O loo faamanatu mai e le Health New Zealand | Te Whatu Ora i aiga uma o le atunuu, auaunaga e lua o loo maua mo lo latou soifua mālōlōina, e lē gata o fautuaga ae o togafitiga.
Healthline – 0800 611 116
O le Healthline o se auaunaga e LĒ TOTOGIA e faaaogā ai le telefoni, e mafai e soo se tasi i Niu Sila ona vili atu ai ma maua fautuaga mo le tausia o lou soifua mālōlōina. O se auaunaga e maua faasoloatoa mo le 24 itula o le aso, i aso Uma e 7 o le vaiaso.
Afai o e popole i lou soifua mālōlōna poo le soifua mālōlōina o se isi tagata o e silafia, e mafai ona e vili le Healthline i le 0800 611 116 ma e talanoa atu i se tausi soifua poo se tasi o loo galue i totonu o taavale a le falema’i o i latou ua lava le agavaa e fesoasoani ia te oe. O le a latou faailoa atu ni fautuaga sili ona aogā mo lou soifua mālōlōina ma faailoa ia te oe isi laasaga e tatau ona e faatino.
O le tamaitai tausi soifua e galue i le Healthline, o Carol Matthes – na faia sana faasoa i luga o le Radio Samoa talu ai nei, ma ia ta’ua ai: “E tāua tele ona nofo silafia o tatou tagata i auaunaga uma o loo avanoa e latou te maua ai fautuaga maufaatuatuaina mo le soifua mālōlōina pe a lagona e lē o malosi. O nisi taimi tatou te faatuutuu lava se’iloga ua matuā ma’i tigaina, ae o le mea moni, e leai se mafuaaga o le a nofoa’i ai, ae mafai ona e vili mai matou i soo se taimi e tusa lava pe na o sina mea itiiti o tau faaletonu.
Afai e te mana’o e fai lau talanoaga i lau lava gagana o loo e malamalama lelei ai, e mafai ona lua talanoa to’alua mai ma sou tauaiga, ma o loo avanoa foi tagata faaliliu upu, e te fesili mai lava mo se tasi pe a e vili mai. E lē totogia foi le auaunaga faaliliu upu.”
Mo nisi faamatalaga i le auaunaga o le Healthline taga’i i le info.health.nz/healthline.
Le fale talavai i lou vaipanoa
O i latou o loo galulue i fale talavai, o nisi ua agavaa ma lesitalaina a le soifua mālōlōina, ma e tele auala eseese e mafai e le fale talavai o loo i lou vaipanoa ona fesoasoani atu ai mo le tausiga o lou aiga. O fale talavai uma lava e mafai ona latou:
- faatulaga atu au talavai
- taliina soo sau fesili e uiga i fualaau ma vailaau
- fesoasoani atu i nai ma’i laiti e pei o le tale, oso le faamaalili, ma le tigā o le fa’aī
- fesoasoani atu i nai manu’a laiti e pei o se mea e lavea, ma’osia pe mafo’e o le tino, ma le mageso ma pata le tino
E iai foi isi fale talavai e mafai ona latou:
- faia tuipuipui mo le misela, tale vivini, fulū ma le koviti
- fai siaki mo le toto maualuga
- avatu fualaau pe a faama’ia le totoga e faaalu ai le fe’auvai (bladder)
- tului mata pe a faama’ia
- faainu se fualaau mo le aiga fuafuaina (contraceptive pill)
- faainu se fualaau mo le aiga fuafuaina mo se tulaga ua moomia vave ai
Na saunoa le Ta’ita’ifono o le Pasifika Pharmacists Association, susuga Diana Phone: “O le tele o taimi, e lē mana’omia ona mua’i faatonu se avanoa e te talanoa atu ai i se tasi o loo galue i le fale talavai, e ui atonu e tau umi sina taimi e te faatalitali ai pe afai o ni taimi pisi o le aso. O nisi taimi e te mana’o ia lua talanoa na o oulua ma se tasi o le aufaigaluega, ma o le tele o fale talavai ua faatulaga se pito o le potu e faia ai lena talanoga totino. Aua e te popole pe afai e te lē o iloa atu lena pito; tau lava o lou fesili i se tasi o le aufaigaluega ona faasino atu lea ia te oe.”
Ina ia sa’ili le fale talavai o loo e nofo latalata iai ma iloa poo ā auaunaga o loo latou faatinoina, taga’i i le healthpoint.co.nz/pharmacy.
