O le tuumalo ai faafuasei o le afioga i le alii Faipule Samoa mai le Vaega Faaupufai a le Green, Afioga Faanānā Efeso Collins, ua matuā lagona ai i lenei aso atoa ma e mautinoa foi a o faasolo pea lenei vaiaso, iuleo o le faanoanoa, o faamaisega, aemaise alofaaga mo le faletua ma si a la fanau, tainane foi le aiga atoa ma uo mamae e faasino i le alii Faipule.

O se tala lava sa lei talia gofie e le toatele o tagata o ē latou te silafia lelei ma masani i le alii Faipule, o nisi ua faanoanoa ae o nisi sa umi o taumafai e faatalitonu o latou mafaufau i lenei tala faafuasei.

O Collins o se tamalii Samoa ma Toelau ua 49 tausaga o lona soifua, ua faaipoipo atu i lona faletua ia Fia ma e toalua o la alo.

O se tamaalii ua iloga lona sao i totonu o Niu Sila i auaunaga eseese sa galue ai aemaise lava i lona tu malosi e uunai polokalame auā se manuia o tupulaga talavou o le Pasefika aemaise lava i tupulaga talavou Samoa, ma o ia foi o se tasi sa finau malosi ina ia tineia uiga faailogalanu.

Sa iai taimi na ia faafoeina ai ni polokalame i luga o alaleo faasalalau e pei o le Radio Samoa, sa ia faia ai se polokalame e taulai atu i le uunaia o talavou ina ia finau mo ni o latou lumanai lelei, aemaise lava i le itu tau i a’oa’oga, ma pe tusa ma le lua tausaga sa ia faafoeina ai lena polokalame i luga o le Radio Samoa i Aukilani.

O le tausaga talu ai ina ua mae’a le faigapalota tele a Niu Sila ma suia ai le faigamalo, ae na sao ai Faanānā i totonu o le Palemene o se sui faipule mai le Lisi a le Vaega Faaupufai a le Green.

Ma o le vaiaso talu ai sa tulai ai Faanānā i totonu o le Maota Fono o le Palemene a Niu Sila, mo lana uluai lauga poo lana lauga faataupou, e faailoa ai aloaia lona tulai mai o se sui faipule fou o le Palemene a Niu Sila.

O lana lauga lea sa ia toe faatepa ai le mamalu o le Palemene ma i latou uma sa auai atu, i se amataga maulalo na amata mai ai lona soifua, i le sailiga malo a nai ona matua na tuua ai Samoa ae autovaa mai i Niu Sila nei, mo se lumanai manuia o i latou le fanau.

O iina sa toto mai ai lava i le mafaufau o Efeso le lagona ia finau malosi, e le gata mo ia ma lona aiga, ae o lona naunautaiga ia faasafua lona alofa ma ana galuega mo isi talavou uma o Samoa ma le Pasefika aemaise lava i tupulaga o Aukilani i Saute.

O se alii na soifua ane i le itu i Saute o Aukilani i Otara, o inā tonu na soifua ane ai ma lona aiga ma a’oa’oina a o laititi e pei ona amata atu ai i aoga tulagalua a le East Tamaki Primary School ma le Ferguson Intermediate School; sa a’oa’oina foi i le Auckland Grammar School a o lei aoga ai i le Tagaroa College.

Mulimuli ane ua see atu i le iunivesite a Aukilani na a’oa’oina ai i mataupu tau faafaiaoga ma faauu mai ai ma lona faailoaga Bachelor of Arts i le tausaga e 1997 sosoo ai ma lona Master of Arts i le tausaga e 1999.

A o a’oga ai Efeso i le iunivesite a Aukilani, sa filifilia o ia i le 1999 e avea ma Peresitene o le Asosi a teine ma tama o le Iunivesite, o se tofiga na tulai mai ai o ia se uluai tagata Pasefika ua filifilia i lea tofiga tāua a le asosi, auā o le avea ai ma peresitene o le asosi, sa tulai ai e fai ma sui o tama ma teine a’oga e momolia ni a latou mataupu ma manaoga i totonu o le Pulega a le Iunivesite.

O ona tuaa, o le susuga i le alii faifeau o le ekalesia Penetekoso, o Pastor Tauiliili Sio Collins ma le tina ia Lotomau Collins.

O ia o le uii o se fanau e toaono i o latou mātua, ma sa faasuafaina o ia e lona aiga i Satufia Satupaitea i Savaii i le suafa matai alii, o le Faanānā.

E maliu nei le Afioga Faanānā ae ua galue i lona tofiga o se sui faipule o le Palemene a Niu Sila, peitai sa tele taimi e pei ona iai i isi lipoti, sa avea ai ma sui o Komiti Faafoe a Puleganuu poo Local Boards mo le pitonuu o Otara-Papatoetoe.

Na tauva foi i le filifiliga o sui faufautua mo le Pulega a Aukilani, ma manumalo ai e toalua ma se tasi o foi tamalii o Samoa o ni Faufautua mo lea Pulega tele.

Na tauva le Afioga Faanānā i le tofi pulenuu o le Aai o Aukilani i le tausaga 2022 ma sa maoa’e lona tulai mai i le lagolago a le aai mo ia e ui e lei manuia lana taumafaiga, ae na lona lua atu ana palota i lē sa manumalo i le tofiga pulenuu, Wayne Brown.

Faamaisega & Moomooga Alofa e manatua ai

James Shaw, Co-leader o le Green Party – “O se tagata polokiki e mafana ona uiga, e moni ma faamaoni ona uiga ma faaaloalo i soo se tasi. Sa avea o ia o se faaa’oa’oga sili i totonu o polokiki ma sa matuā faagaeetia ai a’u, ma ou te faamoemoe o le a toatele nisi tagata e mafai ona latou mulimuli i taiala na soifua ane ai lenei alii… O Faanānā o se tagata sa matuā faaaloalogia i totonu o le Maota Fono….O Efeso o se tagata galue, sa mitamita i le avea o ia o se tamafanau a le Pasefika, o se taitai i ona tagata, o se tamā, o se tane i si ona faletua, ma o se uso ma o se tuagane.” Saunoa Shaw, e iloagofie Collins i ona uiga tausaafia, o lana ‘ata’ata ma lona siuleo e momoli mai ai uiga mautinoa. O se tagata e ola fiafia, e faimea malie, ae agalelei ona uiga ma o se tasi e magafagafa lana tofa.”

Christopher Luxon, Prime Minister o Niu Sila – “Ua ou matuā lagona le faanoanoa i le oo mai o lenei tala i le tuumalo faafuase’i o Efeso Collins. O ia o se tagata lelei, e uiga faaleuo ma agalelei i taimi uma, sa matuā manino mai lona tu malosi e lagolago i ona tagata Samoa ma tagata o Aukilani i Saute. E momoli atu ai a matou faamaisega i si ona aiga, o le afioaga ma ana uo mamae.”

Chris Hipkins, Leader o le Labour Party – E na te manatua lona vaavaai atu ia Efeso ma ia faapea ifo, e le puupuu mai le savaliga ua agai atu nei i ai Efeso, ma o se tagata e tatau ona ‘mata’itu’. Sa matuā manino lelei Efeso i ana agatausili ma lona tulai mai, e mautinoa i ona talitonuga ma o se faanoanoaga lea ona ua vave ona motusia le mafutaga ma lenei faipule lelei ae faatoa tasi se paeaiga a le Palemene ua iai.

Carmel Sepuloni, Debuty Leader o le Labour Party – E malamalama lelei le tamaitai faipule ia Efeso, o se tasi ua leva ona la mafuta i tulaga o a’oa’oga ma galuega sa latou galulue ai faatasi. ‘E malosi lona leo pe a tautala, e faapea foi ona malosi lona tulai e lagolago i meafai a ona tagata Pasefika ma le aoao tetele o Aotearoa’.

Helen Clark, Former PM o Niu Sila – “O le a manatua pea Efeso ona e malolosi lava ona lagona i le tuleiina o le faia o le mea sa’o ma le faimea tonu.”

Debbie Ngarewa-Paker, Co-leader o le Te Pati Māori – Sa momoli ana faamaisega i le aiga faavauvau ma faaleo lana faafetai i le aiga ona o le avanoa sa latou faasoa mai ai Efeso ina ia latou galulue faatasi, ma o le a latou matuā misia lava lenei taitai lelei ma ua mou ese atu ae ua telē se aafiaga lelei ua ia tuua mo latou.

David Seymour, Leader o le ACT Party – O le a matuā misia Efeso i totonu atoa o le Maota o le Palemene. O Efeso o se tagata e matuā naunau, e manino lelei ma faamemelo ona lagona i lona lagolagoina o ona tagata i Aukilani i Saute.